لبيه ياصوت ينادي

لبيه يـا صـوتٍ ينـادي عليّـه
ولبى خفوقٍ زاد نبضـه عشانـي
لبيـه قالتهـا الجـوارح سويّـه
منها يفز القلب وطاعـه لسانـي
أهـلا هلابـك والمشاعـر نديّـه
أرحب بلهفة شوق هـزت كيانـي
عانقت صوتك والأمانـي خفيّـه
بين الرجاء واليأس وحلم الثواني
أشعلت ليلي يـوم طريّـت جيّـه
ومن القصايد جبت عذب المعانـي
دلة غـلاك تفـوح والنـار حيّـه
وصبيت فنجالك من أقصى المحاني
يومك قلطت اليوم عنـدي هديّـه
ما مثلها قدمـت لانسـان ثانـي
قدمت لـك قلـبٍ تشيلـه ايديّـه
فيه الوفاء والصدق طول الزماني
ياللي شبيه البدر مـدري سميّـه
عطيتنـي كلـك وربـي عطانـي
لبيه أرددهـا مسـاء وضحويّـه
ولبيه يـا حـظٍ لدربـك خذانـي